Monday, December 17, 2018

ನೆರಳು

ಸೋಮವಾರ : 

ನನ್ನನ್ನು ಅತ್ಯಂತ ವ್ಯವಸ್ಥಿತವಾಗಿ  ಹಿಂಸಿಸುವದನ್ನು ಆ ಅಪರಿಚಿತ ವ್ಯಕ್ತಿ ಮುಂದುವರಿಸುತ್ತಿದ್ದಾನೆ.  ಬಹುಶ: ಅವನ ಹೆಸರು ಮೋಸರುದ್ದಿನ ಎಂದು ತೋರುತ್ತದೆ. ನಾನು ಅವನ  ಹಿಡಿತಕ್ಕೆ ಸಿಕ್ಕಿಬಿದ್ದುದು ಯಾವಾಗ ಎನ್ನುವದು ಸರಿಯಾಗಿ ನೆನಪಾಗುತ್ತಿಲ್ಲ. ಪ್ರಾಯಶಃ ನಾನು ಹುಟ್ಟಿನಿಂದಲೇ ನನಗರಿವಿಲ್ಲದಂತೆ ಅವನ ಸೆರೆಯಾಳೇನೋ?

ಮಂಗಳವಾರ :

ಇವತ್ತು ಬೆಳಿಗ್ಗೆ ನಾನು ಗಾಂಧೀ ಬಜಾರಿನ ತಣ್ಣಗಿನ ರಸ್ತೆಯಲ್ಲಿ ಆಹ್ಲಾದಕರ ವಾತಾವರಣವನ್ನು ಆನಂದಿಸುತ್ತಾ ನಡೆಯುತ್ತಿದ್ದೆ. ಇದ್ದಕ್ಕಿದ್ದ ಹಾಗೆ ನನ್ನ ಕಾಲುಗಳು ನನಗೆ ಗುರುತು ಪರಿಚಯವಿಲ್ಲದ ರಸ್ತೆಗಳಲ್ಲಿ  ಹೆಜ್ಜೆಹಾಕಲು ಆರಂಭಿಸಿದವು.  ಕೆಲವು ಕ್ಷಣಗಳವರೆಗೂ ನನ್ನದಾಗಿದ್ದ ಗಾಂಧೀ ಬಜಾರಿನ ರಸ್ತೆಗಳು ಈಗ ಮೊಸರುದ್ದೀನ ವಿನ್ಯಾಸ ಮಾಡಿದ ಚಕ್ರವ್ಯೂಹದೊಳಗೆ ಕರೆದೊಯ್ಯುವ ಹಾದಿಯಾಗಿ ರೂಪಾ೦ತರಗೊಂಡಿದ್ದವು. ತಾಸುಗಟ್ಟಲೆ ದಿಕ್ಕು ತಪ್ಪಿ ಅಲೆದಾಡಿದ ಮೇಲೆ  ನಾನು ಮುಂದಕ್ಕೆ ಹೋಗಲು ಅವಕಾಶವಿಲ್ಲದ ಇಕ್ಕಟ್ಟಾದ ಗಲ್ಲಿಯೊಂದರಲ್ಲಿ ಸಿಕ್ಕಿ ಬಿದ್ದೆ. 

ಬುಧವಾರ :

ಇತ್ತೀಚಿಗೆ ನನ್ನ ಜೀವನವು ಪಾಳುಬಿದ್ದ ಹಳ್ಳಿಯೊಂದರ೦ತೆ ದಿನದಿನಕ್ಕೂ  ಸಂಕುಚಿತಗೊಳ್ಳುತ್ತಿದೆ . ಇವೆಲ್ಲವುಗಳಿಂದ  ತಪ್ಪಿಸಿಕೊಂಡು ಎಲ್ಲಿಯಾದರೂ ಓಡಿ ಹೋಗೋಣವೆಂದರೆ ಮೊಸರುದ್ದೀನನ ಕಬಂಧ ಬಾಹುಗಳುಎಲ್ಲೆಡೆಯೂ ಬಿಳಲು ಬಿಟ್ಟಿವೆ. ನಾನು ಅವಿತುಕೊಳ್ಳಲು ಪ್ರಯತ್ನಿಸುವ ಪ್ರತಿ ಮೂಲೆಯಲ್ಲೂ ಅವನು ನನಗಿಂತ ಮೊದಲೇ ಹೋಗಿ  ಕಾಯುತ್ತಿರುತ್ತಾನೆ .  

ಗುರುವಾರ :
 ನಾನು ಮತ್ತ್ತು ಮೊಸರುದ್ದಿನ ಏಕಾಂತದಲ್ಲಿ ಪರಸ್ಪರ ಮುಖಾಮುಖಿಯಾಗುವ ಪ್ರಸ೦ಗ  ಒದಗಿ ಬಂದರೆ ಎನ್ನುವ ಭಯಾನಕ ಯೋಚನೆಗೆ ಆಗಾಗ  ಬೆಚ್ಚಿ ಬೀಳುತ್ತೇನೆ.  ನನ್ನ ಕೋಣೆಯ  ಬಾಗಿಲನ್ನು ಭದ್ರವಾಗಿ ಹಾಕಿಮರದ ತುಂಡನ್ನು ಅಡ್ಡ ಇತ್ತು ಮೊಳೆಯನ್ನು ಹೊಡೆದಿದ್ದೇನೆ. ಕಿಟಕಿಯ ಬಾಗಿಲುಗಳನ್ನು ತೆರೆಯಲು ಬಾರದಂತೆ ಮುಚ್ಚಿದ್ದೇನೆ. ಇಷ್ಟಾದರೂ ಮಂಚದ ಮೇಲೆ ಮಲಗುವಾಗ , ಬಟ್ಟೆ ಬದಲಿಸುವಾಗ ನನ್ನ ಬೆತ್ತಲೆ ದೇಹವನ್ನುಮೊಸರುದ್ದಿನ ಕದ್ದು ನೋಡುತ್ತಿದ್ದಾನೆ ಅನಿಸುತ್ತದೆ. 

ಶುಕ್ರವಾರ :
ಇವತ್ತು ಮಲಗಿದ್ದಲಿಂದ ಸ್ವಲ್ಪವೂ ಮಿಸುಕಾಡದೆ ಮನೆಯಲ್ಲಿಯೇ  ದಿನಪೂರ್ತಿ  ಕಳೆದಿದ್ದೇನೆ. ರಾತ್ರಿ ಇದ್ದಕ್ಕಿದ್ದ ಹಾಗೆ  ನನ್ನ ಸುತ್ತ ವೃತ್ತಾಕಾರದ, ಪೀಪಾಯಿಯಂತಹದೇನೋ ಬೆಳೆಯುತ್ತಿರುವಂತೆ ಭಾಸವಾಯಿತು . 

ಶನಿವಾರ :
ಬೆಳಗ್ಗೆ  ನನಗೆ ಎಚ್ಚರವಾದಾಗ ನಾನು ಚೌಕಾಕಾರದ ಪೆಟ್ಟಿಗೆಯೊಳಗೆ ಮಲಗಿದ್ದೆ. ಕೈ ಕಾಲು ಆಡಿಸಲೂ  ಜಾಗವಿಲ್ಲ. ಈ ಪೆಟ್ಟಿಗೆಯ ಗೋಡೆಗಳನ್ನು ಒಡೆದು ಹೊರಹೋಗಲು ಪ್ರಯತ್ನಿಸುವದು ಉಪಯೋಗವಿಲ್ಲದ  ಕೆಲಸ.ಖಂಡಿತವಾಗಿಯೂ ಈ ಪೆಟ್ಟಿಗೆಯ ಹಿಂದೆ ಇನ್ನೊಂದು ಇಂತಹದೇ ಚೌಕಾಕಾರದ ಪೆಟ್ಟಿಗೆಯಿರುತ್ತದೆ. ಸಂದೇಹವೇ ಬೇಡ ಇದು ಮೊಸರುದ್ದಿನ ನನಗೆಂದೇ ನಿರ್ಮಿಸಿದ ಸೆರೆಮನೆ . 

ಭಾನುವಾರ : 
ಬಂಧಿಯಾಗಿರುವ ಈ ಚೌಕಾಕಾರದ ಪೆಟ್ಟಿಗೆಯೊಳಗಿನಿಂದಲೇ ನಾನು ನಿಧಾನವಾಗಿ ಕೊಳೆಯುತ್ತೇನೆ . ಮೊದಲು ನನ್ನ ದೇಹವೆಲ್ಲ ತುಂಡು ತುಂಡಾಗುತ್ತದೆ. ಆಮೇಲೆ ಸಣ್ಣ ಸಣ್ಣ ಚೂರುಗಳಾಗಿ ವಿಭಜನೆ ಹೊಂದಿ  ನನ್ನ ದೇಹ ದಟ್ಟ ಹಳದಿ ಬಣ್ಣದ ದಪ್ಪನೆಯ ದ್ರವವಾಗಿ ಹರಿಯಲು ಆರಂಭಿಸುತ್ತದೆ. 
ಮೊಸರುದ್ದೀನನ ಹೊರತಾಗಿ ದಯವಿಟ್ಟು ಯಾರೂ ನನ್ನನ್ನು ಜೇನುತುಪ್ಪ ಎಂದು ತಪ್ಪಾಗಿ ತಿಳಿಯಬೇಡಿ. 


ಮೆಕ್ಸಿಕನ್ ಮೂಲ : ಹ್ವಾನ್ ಜೋಸ್ ಅರೇರೊಲ 

ಮೆಕ್ಸಿಕಾದ ಪ್ರಸಿದ್ಧ ಕತೆಗಾರ ಜುವಾನ್ ಜೋಸ್ ಅರೇರೊಲ , ಇಪ್ಪತ್ತನೆಯ ಶತಮಾನದಲ್ಲಿ ಮೆಕ್ಸಿಕಾದ ಸಾಹಿತ್ಯವಲಯವನ್ನು ಅಗಾಧವಾಗಿ ಪ್ರಭಾವಿಸಿದ ಲೇಖಕರಲ್ಲೊಬ್ಬರು. ಮೆಕ್ಸಿಕೋದ ರಿಯಾಲಿಸ್ಟ್ ಸಾಹಿತ್ಯದ ಅಲೆಗೆ ವಿರುದ್ಧವಾಗಿ ಅಸಂಗತ ಕತೆಗಳನ್ನು ಬರೆದವರು. 'ನೆರಳು' ಕತೆಯನ್ನು ಅವರ ಪ್ರಸಿದ್ಧ ಕತಾ ಸಂಕಲನ  'ಕಾನ್ ಫ್ಯಾಬುಲರಿಯೊ'ದಿಂದ ಆಯ್ದುಕೊಳ್ಳಲಾಗಿದೆ